世界漫遊：百威勝可捧新航盃

不死鸟

聽日上演雙料娛樂，先有沙田十一場鴛鴦地賽事，夜晚就轉播兩場新加坡賽事，KrisFlyer國際短途錦標同埋新航國際盃，一日跑夠十三場，由朝玩到晚，大癮嘅馬迷一定可以過足癮。

　　舊年香港有「青蝠王」遠征國際短途錦標，響臨場易配、直路搵位欠順之下，都可以後上跑第三。今年改以「蓮華生輝」同「創惑」兩匹短途王者赴會，單計牌面兩駒都係正路嘅爭標分子。不過，澳洲嘅合法外圍莊家似乎唔係咁睇，兩匹馬初步賠率都比想像中冷得多，其中「蓮華生輝」有八倍、「創惑」更加冷至十七倍，同兩匹大熱門新加坡短途新貴「火箭人」同澳洲短途怪傑「兼併目標」嘅兩點三倍差成條街。

　　至於路程為二千米嘅新航國際盃，澳洲莊家似乎認為係外隊馬天下。上月響女皇盃輕鬆取勝嘅「百威勝」，繼上次響香港被捧至三點九倍熱門後，今仗繼續備受追捧，早盤更加熱到只得二點二五倍，比起五倍嘅次熱門南非代表「精闢圖像」少成一半有多，明顯備受各方看好，捧盃機會高唱。

　　至於改穿高多芬藍色戰衣嘅「希臘寶馬」暫時有六倍，而上仗響澳洲女皇伊利沙伯錦標回勇嘅「龐貝尊主」就有七倍半。主隊馬方面，最熱一匹係新加坡馬王「上旋」，但已係三十一倍冷門。