大勝福星增程更惡

不死鸟

今日有四個騎師停賽，柏寶同白德民就去咗新加坡，分別策「蓮華生輝」同「創惑」出爭國際短途錦標，於是鄧迪被邀請來港客串一日，而胯下嘅「藍天」上仗只以鼻位輸畀「川滙主帥」跑第二，即管睇吓佢可唔可以贏番場。

韋達可做騎師王

        講到機會馬自然冇人夠韋達多，佢今日騎足十一場，其中有唔少已喺隔夜捧成大熱，既然韋達停賽四日柏寶贏咗九場咁多，相信今次會輪到韋達連場數胡，騎師王買韋達必定冇得分，但睇落又幾穩陣，所以小妹都揀咗兩匹韋達坐騎做重心。

        先講第九場三班千八米，「至勇威龍」在港跑三場獲兩冠一季，計質素喺三班仍冇阻力，而近兩仗均後上贏千六米，跑多二百米應冇問題，強配韋達有機會三連捷。

        配腳先揀「飛快勁」，上場同程輸條頸畀「力奇駿馬」跑第二，今場負一一九磅兼排二檔有利，未開齋馬必定有鬥志，坐位望贏唔難做到。「家家興旺」最近三仗跑田草千六米得兩冠一季，場場都交出凌厲追勁，今場抽得九檔起步，對後上馬唔係咁大影響，配腳一席要吼實。再揀可博「同心同德」，升上三班後連番抽排外檔，冇乜表現唔算過分，但既然近兩仗均輸唔遠，證明狀態有番咁上下，呢場抽得一檔，早段可以留守內叠慳位，有分頭宜兼顧。

        另一匹心水係「大勝福星」，呢匹四歲馬前仗初出跑田草一千米得第四，上仗增程二百米即以兩個半馬位開齋，姿態仲相當輕鬆，賽後加十二分證明受重視。今場升上三班但負輕磅，睇腳法增程跑千四米仲啱，力足連捷。「賀喜」有一檔之利、「雄風」同「錢會來」上仗表現佳，不妨拖埋。