家家興旺連珠炮發

不死鸟

初跑千八米即被捧成熱門，理論上唔係咁值博，但第九場「至勇威龍」、「家家興旺」呢兩匹新勝馬的確好惡，估計頭馬非此即彼，臨場應以後駒分頭較佳，不妨秤先。

        前仗「家家興旺」後追甚勁跑第三，結果上仗走位順啲即補中，而且末段話過就過，擺明唔係三班馬。由於贏四分三馬位只加七分，兼且今場為上限八十五分嘅三班賽，搞到佢只須負一二二磅，形勢認真着數。雖然首次跑千八米，但連贏兩仗嘅「至勇威龍」同樣冇路程根據，而今場最高分嘅「好知己」磅重兼鞍上人手風弱，至於「揀得正」則排十二檔，計落都係以「家家興旺」最四平八穩﹔杜利萊跑埋今日要坐馬監，盃賽當前相信必搏甩髀。

         西甲希杭現時排第十八，如果再唔能夠脫離尾三位置，季後就要宣布降班﹔呢隊波有一特色，就係唔鍾意和波，今季暫時踢咗三十五場，居然只得一次開和，今晚主場對力爭來季歐洲賽資格嘅馬拉加，預計戰況必定激烈。

        從球迷角度出發，希杭嘅全攻型打法自然好睇，但防守力實在不敢恭維，今季已失七十六球，成績係西甲中最差，加上馬拉加目前排第八，執筆時只落後第六名嘅拉科魯尼亞兩分，即係仲有機會爭入前列，而且踏入09年後，馬拉加未試過連續兩場作客輸波，信攤路係時候捧場，讓球開平手盤要揀客勝。