日本拍跳炒塞振聲威

猪拉多纳

亞洲勁旅日本早前決選23人名單後，一直喺鹿兒島進行集訓，球隊今晚會移師埼玉體育場同歐洲三線球隊塞浦路斯「拍跳」，喺一眾主力相繼回歸下有望大勝一仗，阿謙捧讓球主勝。

（周二晚6時30分開賽）

日本早前已公布出戰巴西世界盃的23人大軍名單，球隊及後一直喺九州嘅鹿兒島進行集訓，早前未能如期歸隊嘅AC米蘭前鋒本田圭佑及標準列治門將川島永嗣亦已加入集訓，球隊現時只有史特加後衞酒井高德一員傷兵今仗無法上陣。值得一提係，日本前鋒大久保嘉人自2012年以嚟首次再代表國家隊上陣，今仗自然希望取得入球獲主帥沙哲朗尼信任，喺嚟緊嘅世界盃穩佔正選前鋒位置。
塞浦路斯未夠班難捱

塞浦路斯今次嚟日本嘅主力球員大都係効力國內球隊，外流球員中以瑞士錫永前鋒基斯杜菲、烏克蘭當尼斯克中場馬基迪斯及捷克歷基亞後衞杜斯祖利亞名氣較響，而上述三人皆可望上陣。不過，塞浦路斯實力只屬一般，喺2014世界盃外圍賽排包尾，連阿爾巴尼亞同冰島都贏唔到，今仗面對實力達歐洲二線頭嘅日本，相信都係待做炮灰，讓球主勝值得支持。