紅簿仔輕磅仲正

猪拉多纳

　　阿棟份人好實際，騎師爭冠軍，關我咩事？邊個做冠軍練馬師，都與我無關，賭馬賭咗咁多年，幾峰迴路轉嘅場面都見過晒啦，反而，邊個鬥志旺盛，先至係我哋喺季末最值得留意。

　　第五場三班1650米。「紅簿仔」之前畀薛寶力搏過，喺四班呢項路程跑二三名，之後轉由何澤堯出馬，成績一般，方仔終於都係搵潘頓搞掂，上次贏起嚟真係超晒班。呢匹馬得一千磅左右，上番三班負輕磅，點都好跑啲，今晚方仔成手馬列陣，呢隻新勝馬點會唔配合。

　　第六場三班1200米。睇完「大寶藏」上場潘頓點騎，即刻唸起三字經，末段未至於垂手，但力度「軟奶奶」係鐵一般事實，咁都畀佢過到骨，我都冇說話好講。但一次好彩，唔代表下次冇事，呢次佢再騎上馬背，一定會全力以赴。

　　第八場二班1200米。「同個夢想」上場輸咩，大家都有眼見，直路長時間望空唔到，神仙都難變，呢啲意外冇人想，所以，我唔會怪責韋達。今場佢仲有策騎權，一定要好好把握，正所謂戴罪立功，如果再輸，隨時畀大摩嫌棄，咁就失咗條大水喉。陳華棟 資深評馬人