牙買加遊埠心態益瑞士

猪拉多纳

今晚上演多場國際熱身賽，世界盃參賽球隊瑞士於主場迎戰牙買加。瑞士踢法實而不華，陣中一眾德甲兵梳頓沙基利、祖斯比迪米斯、格列沙加於過去球季都有好表現，有力擊敗抱遊埠心態嘅牙買加，熱捧讓球主勝。

瑞士領隊希斯菲特已經落實決賽周23人大軍名單，後防線靠辛德路斯、列治史迪拿以老帶新，前場則朝氣勃勃，中場由隊長恩拿領軍，配合多名德甲兵包括梳頓沙基利、格列沙加、基爾臣費南迪斯及祖斯比迪米斯等等，其中21歲嘅祖斯比迪米斯今季替紐倫堡於德甲射入17球，僅以3球落後神射手羅拔利雲度夫斯基，射術可見一斑，來季佢將轉投利華古遜，成就有望更上一層樓，勢成瑞士今屆世盃秘密武器。
奧地利主場破「冰」

牙買加無緣今屆世盃決賽周，今戰屬練兵性質，而且陣中大部分球員來自國內聯賽，海外兵如列斯聯中場魯多夫柯士甸、打比郡前鋒西蒙戴堅斯都係踢緊次級聯賽，水準有限，輸兩、三粒正路。另一場熱身賽由兩支冇份出戰世界盃嘅歐洲隊交手，奧地利主場鬥冰島。奧地利主力阿拉巴、阿拿奧杜域俱有入選，有力擊敗三流球隊冰島。最後瑞典超奧雷布洛主場鬥佐加頓斯，佐加頓斯五場不勝只入兩球，攻力疲弱，再追細啱數。