計得精明:（張沖）瀟洒叻龍三班夠惡

不死鸟

 徐雨石今季頭馬數字暫不及去季，上季徐廐取得五十一場頭馬，名列練馬師榜第三位，雖然成績輝煌，但亦令旗下馬用得七七八八，故今季成績下滑可以理解。

        另外，今季徐廐不少高分自購馬如「朝東飛駒」、「驕陽飛駒」、「安競」及「士多啤梨」等，都因進度問題而未能交出成績，亦是令馬房成績放緩的原因。在兵源未算太充足的情況下，徐廐現時仍然可以取得三十場頭馬，已算難能可貴，加上練者一向重用華將及見習騎師，後者作賽經驗較淺，有時搏輸也是在所難免。

        回說今次賽事，睇好列陣第六場三班一哩的「瀟洒叻龍」，此駒可說係徐雨石成名作之一，接手後已先後取得七捷，上季更贏過三場頭馬。不過，馬匹畢竟係血肉之軀，始終有一個極限，「瀟洒叻龍」升上二班後真係技不如人，評分亦冇優勢可言，幸好經過大半季的調整後，評分由高位回落至現時的八十二分，可出戰頂分為八十五分的三班賽事。

        上仗「瀟洒叻龍」出爭二千二百米，楊明綸起步失機，最終跑第十而回敗不足據。今戰轉爭更擅長的谷草一哩，若跑回季初在同程力拼「駕進」的水準，當可重開勝門。