馬房秘聞:（探子）魅力漢子有搏殺動靜

不死鸟

 ▲徐君禮由於尿液含違禁物質，所以暫時被禁止出賽，略為打亂東廐馬嘅操練部署。而噚朝告仔要搵柏寶、楊啟棠幫手，旗下馬匹先可以如常試大閘，相信短期內東廐馬除倚重另一徒弟蔡明紹外，都會搵埋呢兩位咁抵得諗嘅騎師搏殺。

        ▲「魅力漢子」馬主噚朝入場督操，期間吳定強好細心咁講解馬匹情況，由於呢匹馬曾有傷患，所以近日馬房安排咗按摩師服侍，令到馬匹肌肉得到鬆馳，而倉主更安排呢隻馬近日下晝行石屎地，呢招亦係馬房搏殺先兆之一。馬房做咗咁多工夫，無非都係想呢匹九歲馬聽晚可以跑出最佳水準，啱心水可以捧場。

        ▲「好機緣」馬主前日下晝入倉探班，一班馬房手足話呢匹馬近期食得操得，仲餐餐掃清食料盤，最難得係馬身並冇肥到，馬房一致認為係好現象，有信心重開勝門。

        ▲何良剛戰起孖兼贏出在港第三百場頭馬，所以近兩朝都笑容滿面。噚朝「年年開心」、「奧利皇子」踱步之後，良哥親自接馬並詳細查問鞍上人兩駒操練情況，動態相當積極。雖然何良已經一早贏夠十三Ｗ上岸，但睇動靜響季尾階段似乎仍會繼續展開攻勢，並未有放軟手腳迹象，值得吼實。