巴西決賽穩膽 冷敲德國Vs意大利

猪拉多纳

今屆世盃喺足球強國巴西舉行，若然要玩世盃決賽組合，巴西呢個膽睇怕走唔甩，而且搵巴西拖西班牙或者阿根廷就係最正路嘅投X選擇。若然鍾意吼冷，不妨試吓德國對阿根廷。
19屆世盃歐洲隊17次入決賽

巴西近年改踢務實足球，防守穩健，前線有尼馬、侯克同費特組成進攻三叉戟，再加埋地利優勢，要殺入決賽唔難。喺過去19屆世盃入面，17屆都有歐洲球隊殺入決賽，當中近年橫掃各項大賽冠軍嘅西班牙就係大熱，雖然西班牙身處B組，一旦小組次名出線就要喺16強面對巴西，不過佢哋要小組首名出線避開巴西相信都唔難，因為西班牙同組最大勁敵都係上屆世盃決賽對手荷蘭，不過荷蘭已經今非昔比，青黃不接，所以西班牙有力以小組首名出線。

不過，歐洲球隊最大嘅敵人係天氣，球員往往難適應南美嘅濕熱天氣，呢樣就係點解歐洲球隊從未試過喺南美洲攞過世盃嘅原因。如果覺得西班牙揀唔落手，可以諗吓巴西拖另一支南美球隊阿根廷，阿根廷喺F組一枝獨秀，首名出線冇問題，估計走下線嘅對手唔算強，入決賽嘅機會頗大。

最後，想扒冷嘅朋友可以考慮德國對意大利，現時德國擁有黃金一代，球員有技術又有經驗，況且德軍向來好識喺大賽走線，近3屆世盃均入4強兼有1次入到決賽，值得捧場。至於意大利不嬲係大賽專家，成日喺畀人睇淡嘅情況下「唔聲唔聲，嚇你一驚」，06年世盃就係一個好例子，喜歡冷門嘅人就最啱揀呢隊波。
熱門推介：巴西 Vs 西班牙、巴西 Vs 阿根廷

冷門推介：德國 Vs 意大利