尹戈爾名師剋高徒

猪拉多纳

「牛王」解讀 冇人夠佢熟

世盃B組首輪即爆發上屆決賽翻版西班牙對荷蘭，「鬥牛國」近年喺國際大賽稱王稱霸，一對巴塞中場沙維同恩尼斯達亦名揚天下，但假如十幾年前冇現任荷蘭領隊尹戈爾獨具慧眼，大膽喺青訓營提拔呢對「天下無雙」，西班牙未必有今日盛世。今日沙場再遇，尹戈爾熟晒徒弟特性同西班牙嘅戰術體系，實會有計策剋制「牛王」。

西班牙近年靠Tiki-Taka踢法，史無前例連續喺3項大賽（2010世盃及08、12歐國盃）封王，呢種與巴塞一脈相承嘅傳控打法，有人話係前西班牙領隊阿拉干利斯確立沙維同恩尼斯達為中場核心而為王朝奠基，亦有人認為兩代巴塞教頭列卡特及哥迪奧拿不斷調校，令雙核兼容相得益彰，但二人一定會感激現年62歲嘅荷蘭主帥尹戈爾。88年荷蘭球王告魯夫執教巴塞，先將「全能足球」於西班牙播種，但之後令其生根嘅卻係另一位荷蘭人尹戈爾。
獨具慧眼大膽提拔

尹戈爾98年首度執教巴塞期間，雖已擁有優秀指揮官哥迪奧拿，但佢98年仍然喺拉馬西亞（巴塞青訓營）提升沙維，並予以重用，並培養成為指揮官型中場。到2002年尹老重返「地上最強」，又發掘出年僅18歲嘅恩尼斯達，更讓「小白」喺歐聯作客布魯日完成A隊處子戰。喺當時鐵血防中橫行嘅世代，尹戈爾大膽起用奀挑鬼命嘅沙維同「小白」，正係睇中佢哋喺場上轉數夠高，攞波之前已經諗定幾條傳波路線，創造撕破對方後防製造殺機嘅空間，他朝必成大器。

拉馬西亞其實一直收藏咗好多璞玉，可惜喺巴塞巨大成績壓力下，並非個個教頭都敢於起用新仔，令到苦無出頭嘅法比加斯、阿迪達、堤亞高艾簡達拿等自家青訓產品不斷流失。故無論巴塞定係西班牙至今仍然倚靠呢對「雙核」作為球隊靈魂，可以話直到現在仍然恩澤於尹戈爾當年嘅慧眼。
各為其主絕冇面畀

尹戈爾對兩位愛徒讚不絕口：「恩尼斯達擁有獨到視野及出色控球技術，沙維傳波嘅選擇總係好正確，但二人比較前者天分更高。」尹戈爾喺14年前辭任巴塞教頭時冇球員送機，只得沙維叫老竇揸車趕去機場，喊晒口送別恩師，「小白」亦難忘尹戈爾知遇之恩：「我永遠對佢心存感激，佢唔單提拔我，仲不斷畀到我信心，佢嘅指導令我畢生受用。」

不過落場無父子，今晚「雙核」鬥荷蘭唔會畀面恩師，而「尹老」熟知西班牙戰術套路，當然亦會曉教橙軍如何去制衡兩位愛徒，從而削弱西班牙嘅中場威力。

（無綫翡翠台、明珠台、TVB13、now818及840台周六凌晨3時直播）
大戰數讀

0:荷蘭對上3次參與世界盃決賽周，包括2010年南非世盃、06年德國世盃同98年法國世盃，首場分組賽賽事都能夠保持0失球。

1:未計今屆，西班牙總共參加過13次世盃決賽周，但當中只有1屆能夠保持不敗，就係02年嘅韓日世盃，佢哋喺8強戰出局只係互射12碼輪畀南韓，上屆南非世盃佢哋雖然奪冠，但分組首戰就落筆打三更，輸咗畀瑞士。

8:西班牙喺上屆世盃決賽擊敗荷蘭，成為世盃史上第8支冠軍球隊。巧合嘅係，「鬥牛兵團」喺該屆世盃只係入咗8球，成為最少入球嘅冠軍球隊。

22:荷蘭喺世盃決賽周總共贏咗22場，係眾多未贏過世盃嘅國家入面贏得最多場數嘅一隊，係名副其實嘅「無冕之王」。

100:如果荷蘭中場大將史奈達今仗披甲，將會係佢第100次代表荷蘭上陣，不過同橙軍「喼帽王」雲達沙嘅130次比，仲差成條街。

433:西班牙門神卡斯拿斯喺世界盃已經有連續433分鐘保持不失球，佢只要喺今場對荷蘭守多85分鐘，就能夠打破意大利門將辛格所保持嘅517分鐘世盃不失球紀錄。

43:荷蘭隊長尹佩斯現時以43個國際賽入球成為荷蘭史上入波最多球員，打破咗名宿，現任荷蘭助教古華特保持咗整整10年嘅40個入球紀錄，非常威水。