諾在其中:（馮諾嘉）愛睦善試準開勝門

不死鸟

「蓮華生輝」遠征新加坡，成功勇奪國際短途錦標冠軍之餘，仲以破當地千二米紀錄時間，壓倒七戰七勝嘅主隊馬「火箭人」，除本身質素超群外，最關鍵都係抽到一檔有利，睇嚟姚本輝近排手氣都唔錯，好似啱啱周四出四駒，雖然大熱門「化工之昇」唔知做乜跑得咁曳，但至少已爆出「寶威威」呢匹十二倍嘅冷門馬。

        聽日馬會喺沙田馬場為「蓮華生輝」舉行祝捷會，入場馬迷仲可獲贈紀念咭，小妹覺得同「蓮華生輝」合照會係其中最吸引馬迷嘅部分。之前曾同姚本輝做專訪，佢專登拉咗「蓮華生輝」走兩圈畀我影相，可惜當時冇同呢匹馬王合照，所以有興趣嘅馬迷，千祈咪錯過呢個咁好嘅機會﹗睇番今戰四匹姚廐參戰馬，「金津好」、「得令先鋒」同「愛睦善」都係機會分子，絕對有機會替馬房延續勝勢，自己就最鍾意角逐四班千六米嘅「愛睦善」。

        今年只得三歲嘅「愛睦善」，今季首度上陣後已跑七次，經常報爭唔同路程，似乎幕後仲摸索緊最佳路程同部署減分，所以次次都有一定分頭。二月尾喺田草千六米跑近後，之後又走去跑千二同千四米，直至上仗回師田草千六米，埋門只得六倍，證明已有心出擊，結果輸個幾馬位畀大熱門「戴宗」跑第二，雖然已徹底露光，但呢場冇轉程應會繼續搏殺，未開齋馬係時候出頭。