比連爭取支持撐國足「讓主」

猪拉多纳

中國新一任教練比連2月底上任，國內傳媒同球迷都唔睇好佢有乜作為，不過國足上周三喺主場以2:0擊敗馬其頓，為比連贏得「地標戰」。今晚再鬥馬其頓，比連梗係想兩連勝爭取更多球迷支持。讓球主客和開國足讓一球，2.9倍嘅「讓主」撐得過。

（開賽時間：周日下午4:00）
馬其頓防線開窿

中國足協宣布比連為國足新帥後，國內傳媒批死佢下年亞洲盃之後就會「下課」之餘，仲爆料話請佢都係貪佢人工夠平，搞到球迷寸足協係咪喺淘寶「淘」比連返嚟，認真冇陰功。不過，呢位法籍教頭曾經帶領里昂奪得2007至08年法甲冠軍，剩係呢個履歷都知佢有料，而且佢上任後一個月，不停四圍飛睇中超球隊喺聯賽、亞冠盃嘅比賽，咁勤力做功課，睇得出佢對呢份工有幾認真。

比連早前安排咗幾場熱身賽，上個禮拜已經對咗馬其頓一次，而呢場「地標戰」更用咗唔少新人，但就已經睇得出班球員好清楚自己場上嘅任務，最後憑住于漢超同高迪各入一粒淨勝兩球，嚟緊呢場，相信比連會繼續試用新人同埋新戰術。對手馬其頓方面，首戰防守開晒窿，進攻亦唔足以構成太大威脅，今日再戰要扭轉劣勢相信唔係咁容易。