世界漫遊:彼德威武雄星轉場起筷

不死鸟

舊年響香港短途錦標跑第三嘅「阿帕奇貓」，響上周六乘住老對手「兼併目標」轉戰獅城，以壓倒性姿態捧走東奔一萬錦標，今年內第二度勝出一級賽，成為繼Black Onyx（1969、70年）、Prince Trialia （1990、91年）及「飛快龍」（2001、02年）後，另一匹連續兩年勝出呢項一三五○米賽事嘅名駒。

        賽後練馬師余理萊話贏一級賽從來唔易，但係「阿帕奇貓」今仗贏馬姿態就同舊年一樣出色，佢仲話如「阿帕奇貓」出爭響下月舉行嘅一級賽史德布克讓賽或要負132磅上陣，實在太過苛刻，加上今年已經贏咗兩場一級賽，所以決定畀匹馬唞一唞，到春季先至響一哩賽復出。如果到時證明到「阿帕奇貓」有長力嘅話，就會再帶呢匹馬來港轉爭一哩錦標，希望可一雪前恥。

        至於響東奔一萬錦標後上不及跑第三嘅「潮汕菁英」，練馬師白利偉話對於呢隻馬能夠殺入三甲，已經感到喜出望外，皆因賽前不幸抽到外檔起步，佢一早已經打定輸數，睇直播時見唔到呢匹馬，仲以為佢響陣上斷咗腳，到重播先至知原來呢隻馬飛咗出大外檔追趕。賽後韋紀力就同白利偉講，如果嗰場跑多一百米，頭馬一定非「潮汕菁英」莫屬，仲話呢隻馬轉去歐洲發展一定有馬贏。

        至於返咗去跑呢場大賽嘅潘頓，雖然最終只跑尾二，但係響同日舉行嘅另一場三級賽，就憑Reggie交出頭馬，總算冇白行一趟，跟手返到香港仲響重頭戲沙田銀瓶夥拍「威武雄獅」捧盃，手風認真大順﹗

        講番聽晚賽事，與「威武雄獅」同主嘅「威武雄星」出爭第五場四班一哩，呢匹馬對上六戰未甩過前五名，演出夠晒準繩，今番轉爭水準較低嘅谷草賽事有力言勝。