森巴足球未來一片灰暗

猪拉多纳

慘敗之後嘅心情，加上破碎嘅心靈，畀全國人民鬧爆嘅巴西球員，仲要踢多場慘過啃豬頭骨嘅季軍戰，依家都冇乜人理佢哋點樣備戰呢場波，反而有好多死因研訊庭繼續開庭，其實再講對德國嗰場嘅戰術部署點樣失策已經冇乜意義，更深層次嘅係巴西足球嘅未來一片灰暗。

巴西嚟自車仔、曼城、巴塞、皇馬、國米同拜仁呢啲一線豪門効力嘅球員，只係佔咗全隊4成左右，有啲仲唔係球隊嘅必然正選，同當年嘅羅馬里奧、李華度、大哨同細哨等球星，喺歐洲5大聯賽當中呼風喚雨完全不同，心水清嘅會發現，依家巴西球員嘅質素，好難畀歐洲豪門悉數吸納。
為高薪甘踢低水準聯賽

另一個現象係球員向錢看，曾幾何時會諗到喺俄羅斯搵食嘅侯克、烏克蘭嘅班納特同美職聯嘅祖利奧施薩，竟然能夠喺巴西隊中佔據主力位置。東歐聯賽同球會近幾年大把水，畀大筆轉會費濕濕碎，愈嚟愈多巴西球員難以拒絕金錢嘅誘惑去東歐搵食，結果就係失去咗喺高水準聯賽磨練嘅機會。

更嚴重嘅係心理質素，要成功之前更重要係點樣面對失敗，對德國幾分鐘之內全面崩潰！球員喺低水準聯賽得唔到高水平訓練同比賽鍛煉心理。雖然巴西球員唱國歌表現空前團結，看似內心強大，但係到關鍵時刻無比脆弱，底氣嚴重不足。究竟慘敗之後嘅巴西會變成點樣？我同Peter今晚講呢場季軍戰時再同大家剖析！