見招拆招（精叻仔）伍碧權分秒必爭

不死鸟

季尾階段，馬房同馬匹嘅鬥志往往比馬匹實力更為重要，現時吼實一眾下游馬房，又或者係未交代嘅馬匹，應該冇錯。

        第二場五班千六米，「分秒必爭」季內曾經贏過田草千四米，其後亦曾響四班跑近「紅日」上名，賽績相當硬淨。計血統，呢隻馬出自「奇異光芒」，冇理由只得千四米長力，上仗跑泥地一哩，除為咗減分外，亦有意試準氣量，今仗重返五班即增程跑千六米，照計可以應付。改由勞愛德操刀，估計應有一定分頭，排五檔起步有利進取，隨時為伍碧權取得今季第十三場頭馬，不妨捧場。

        第五場四班千四米，「海王子」季內第二仗曾經響同程閘前瘋狂落飛，最後以四倍大熱門身分開跑，可惜最後卻以短頭位不敵「確叻星」得第二，搏殺失手。其後呢隻馬屢戰屢敗，未試過再入三甲，主要係馬房唔想對呢匹三歲馬過分催谷。「海王子」唞近三個月後，聽日先再出賽，上周二馬房曾經安排試大閘，做好準備工夫才跑今仗，應是時候贏馬交代。