卡加大師泥地血統

不死鸟

第六場四班1650米（泥地）。今場有4匹馬第一次涉足泥地作賽，其中「寶貝王子」剛在3班草地初有走勢，這次落班試埋泥閘肯定受人注目，查番血統，「羅莎」一族現役有「又快又勁」響2班泥戰入過Q，兩季前亦有「得多多」兩勝3班泥地，加上母系出自GEIGER COUNTER，此血統昔日出產過「喜飛勝將」、「數糊」等泥地專家，有理由相信「寶貝王子」擅打泥戰，至怕排13檔留得太後。
成日聽人話跑泥地最緊要夠噸位，所以今場對「卡加大師」亦要留神，此匹千三磅龐然大物，係由其中一位馬主、著名藝人曾志偉親自培育，血緣方面，老豆CAPE CROSS昔日在歐洲贏開一哩草地賽，子嗣中便有「好芝味」、「恒運財星」贏過泥地，母馬ELEDANCE未有上陣，但其父DANCING SPREE原來是89年美國育馬者盃泥地短途大賽冠軍，證明上下線都係擅泥一族；今次「卡加大師」突然有這樣部署，事前又未試過泥閘，擺明想博你唔信，對上兩場響3班田草1600米都放到第5，何妨一試。