少壯AC唔赦希臘班霸

猪拉多纳

恩沙基青春革命 首擊搶W

國際冠軍盃正式開打，明早率先上演B組賽事，由意甲褪色勁旅AC米蘭喺加拿大多倫多BMO球場火併希臘班霸奧林比亞高斯。「紅黑兵團」今夏扶正「9爺」恩沙基接掌帥印，呢位前AC青年軍少帥決心改革，其麾下一班90後新星又潛力無限，對住仍未操起嘅奧林比亞高斯，自然想趁機Show Off，順便幫「9爺」執教正式賽事第一擊贏波省靚塊招牌，斯維今場力撐主W。

（有線61及201周五早上8時直播）
90後新兵等上位

昔日身穿AC米蘭9號波衫嘅「死雞王」恩沙基，今夏接替舊隊友施多夫執教「紅黑兵團」，由於佢上季教緊該隊青年軍兼且捧盃而回，適逢AC今季青黃不接及緣盡歐洲賽，正好畀「9爺」嚟個大改革機會。

睇番AC出征美國嘅31人名單中，既有巴洛迪利、麥薩斯、本田圭佑同新加盟嘅阿歷士洛里高、文尼斯等球星，亦召入多名青年隊舊部，包括天才橫溢嘅前U17隊長馬斯托利，呢位新星上季在「9爺」麾下係中場核心，備受睇好日後會成大器。至於麻煩少年麥巴耶尼安，年頭被外借到蒙彼利埃期間撞車兼搵人頂包，搞到滿城風雨，今夏重返AC決定洗心革面踢好波，加上上季飽受傷患困擾嘅艾沙拉維及迪施基利奧都已康復，而呢次「青春革命」將令近年戰績低沉的AC帶來新希望。

雖然奧林比亞高斯亦唔係人咁品，呢支上屆喺歐聯16強幾乎搞死曼聯嘅希臘一哥，續有「野兔」沙維奧拿、艾真度杜明基斯等老將壓陣，今夏仲從摩納哥簽入法國老將「生命鬥士」艾比度及富咸中場卡沙米，實力唔曳，但始終啱啱放完暑假，之前兩場熱身賽又未嘗一勝，睇到佢哋狀態一般。
奧林比亞高斯缺態

依家AC成班生牯仔朝氣勃勃，而且該隊冇錢增兵，繼送走卡卡後，另一巴西兵羅賓奴亦快將離隊，故重用新人乃大勢所趨，難得恩沙基希望藉住今次國際冠軍盃考察新人表現，呢班90後少壯派梗係想爭取表現博上位啦！加上今場係「9爺」扶正後首仗重量級熱身賽，仲唔趁住奧林比亞高斯缺態打響頭炮咩，主W捧得過。