皇馬半力夠贏國米

猪拉多纳

大聖爺單拖搞掂晒

明早國際冠軍盃仲有另一場A組賽事，上屆盟主皇家馬德里喺伯克利加州紀念球場硬撼意甲勁旅國際米蘭。雖然「銀河艦隊」有多名世盃國腳缺陣，包括萬人迷C朗，啱啱加盟嘅「J神」占士洛迪古斯同卻奧斯都未歸隊，可謂半力出擊，但佢哋勝在後備兵源強勁，剩係「大聖爺」加里夫巴利一個都夠玩殘青黃不接嘅國米，一於捧主W，撐「銀河艦隊」旗開得勝。

(有線61及201台周日早上6時直播)
世盃球星仲未歸隊

提起皇馬，相信大家會即刻諗起剛加盟嘅「J神」占士洛迪古斯，不過Sorry喎，由於呢位哥倫比亞新星喺6月尾至踢完世盃，佢同賓施馬、華拉尼等踢到8強嘅世盃國腳會喺下月初先歸隊，一直受膝傷困擾嘅萬人迷C朗，則因要接受特別治療而避戰。好彩「銀河艦隊」勝在大把人用，其中威爾斯球星加里夫巴利賽前直言，冇得踢世盃令佢有系統地完成整個季前集訓，體能儲備充足，自然更快上力。「大聖爺」貴為天價飛翼，但一季還一季，佢深明「J神」、卻奧斯等「新寵」來投，會令爭位情況更激烈，所以佢要keep住搏命操。
重建階段惡唔出樣

相反，「藍黑兵團」國米面對新舊交替期，4大阿根廷長老辛尼迪、甘比亞素、迪亞高米列圖、森美爾全部退役或離隊，只能靠漢丹洛域、蘭奴捷亞、長友佑都及新加盟嘅前曼聯鐵衞尼曼查維迪支撐，4年前嘅歐聯冠軍陣容已經散晒，就算買人都係揀一啲豪門棄將，主帥馬沙利坦言球隊處於重建階段。佢哋嘅同市死敵AC米蘭，喺前日國冠盃竟然慘敗畀奧林比亞高斯，意甲整體水平持續下滑，面對加里夫巴利嘅屈機踢法，真係頂唔順，何況艾斯高、伊拿拉文迪等邊緣人質素唔曳，必定要趁呢類熱身賽，喺主帥安察洛堤面前爭取表現，預計皇馬會非常搶韁，主W乃不二之選。