諾在其中（馮諾嘉）:龍子開竅穩連捷

不死鸟

馬季已進入尾聲，不論人馬唔多唔少都會身心俱疲，其實就算馬季未煞科，唔少同行已一心諗住去邊度玩。小妹喺馬圈已做咗一段日子，以往通常喺七月左右就會去旅行充電，不過據講馬會申請下季跑多五個賽日，如果成事嘅話，下季就要到七月中先唞暑。

　　另外，以往七月尾先正式開操，不過今年七月十三日踱步圈將正式重開，假如下季真係加多五個賽日，咁會唔會煞科後即接住開操呢﹖估計到時工作一定排得密麻麻，而且工作日子長咗，變相暑假就放得少咗，都係唔好諗咁多，一於趁今個暑假好好去旅行玩多幾日﹗

　　要旅行自然想喺馬場搵旅費，聽晚兩匹心水都係出自霍利時馬房，其中第二場五班一哩，「龍子」上仗出爭同程兼首次用韋達，果然有脫胎換骨演出，入到直路後已見佢跟喺中間，結果末段追勢凌厲，並以頸位壓倒「年年開心」同「好機緣」打開勝利之門，今次人馬再來兼抽得四檔，形勢同上仗差唔多，開竅後有力打鐵趁熱取得連捷。

亞洲橙王再接再厲

　　另一匹心水係第三場四班千二米嘅「亞洲橙王」，呢匹老牌處女馬嚟到季尾終於打開勝門，尤其前仗配韋達跑同程，當時排十檔但臨場一樣捧成大熱，就知台前幕後信心十足，最終贏個幾馬位輕取對手。可能因馬匹狀態弗，所以霍利時亦唔等韋達停賽復出，結果上仗改配馬偉昌再下一城，呢場回配韋達兼排黃金一檔，力足連下三城。