世界漫遊（彼德）:功力勁收復失地

不死鸟

美國三冠尾關賽事貝蒙錦標，將會出現全男班競逐嘅情況，因為新晉馬后Rachel Alexandra嘅馬主Jess Jackson，日前已決定棄爭呢項賽事。

　　睇番Rachel Alexandra上仗雖然越組出戰必利是錦標，兼以全場唯一雌馬身分取得頭馬，但由於取勝距離較以往大幅收窄，而且埋門畀對手愈迫愈近，所以賽後已經有消息傳出幕後有意見好就收，唔再報跑路程更長嘅尾關貝蒙錦標。

　　擾攘多日之後，Rachel Alexandra嘅馬主Jess Jackson響上周五發出新聞稿，正式宣布棄爭貝蒙錦標，主要原因係Rachel Alexandra自三月中以嚟四戰級際賽全勝，當中包括響三周內連取肯塔基橡樹同必利是錦標兩項經典一級賽，令體力亦都消耗咗唔少，依家係時候畀呢隻馬回一回氣，所以決定響貝蒙錦標高掛免戰牌，將目標改為本月廿七日響貝蒙園舉行嘅泥地千八米紐約三冠馬后次關母鵝錦標。

　　今次幕後唔安排Rachel Alexandra跑貝蒙錦標，相信會令唔少忠實Fans感到失望，但係布利萊就應該無任歡迎，因為佢唔使再為咗揀騎邊匹坐騎出戰而頭痛，唔會好似必利是錦標嗰陣咁順得哥情失嫂意。雖然今年三冠馬王又會再懸空，但如果布利萊可以憑其他坐騎贏埋尾關，成為史上首位騎超過一匹馬包辦三冠嘅騎師，都算係值得期待嘅情況。

　　講番本地賽事，盃王大摩剛戰憑「爆冷」捧走本地三冠尾關遮打盃，令呢匹馬增添成為今屆馬王嘅本錢，既然大摩手風咁順，聽晚應該會乘勝追擊，估計今次夜賽必有王者興。

　　筆者就最睇好出戰第七場三班千二米嘅「功力勁」，上場跑一千米不敵超班馬「孫子奇兵」得第二，可謂非戰之罪﹔今次強手已去，回師曾贏過嘅千二米應可坐正。