皇馬拉雜成軍雌狼有火抵捧

猪拉多纳

國際冠軍盃隊隊猛料，自不然成為休季期間餓波球迷嘅焦點，之不過唔少球星都仲放緊假，盲目捧名牌盞中伏。好似聽朝皇馬對羅馬場波咁，「銀河艦隊」根本係拉雜成軍，倒不如捧近況唔錯兼有比真歷同托迪孭飛嘅「雌狼」仲穩陣，冷敲3.8倍客W。

（有線61及201周三早上9:15直播）
羅馬齊腳主力孭飛

皇馬今夏斥資過億歐元簽入卻奧斯同占士洛迪古斯，但佢兩個都仲放緊假，王牌C朗雖然已經抵達美國，並會隨隊到今仗地點達拉斯，不過佢會唔會落場仲係未知數，況且呢啲季前賽旨在練兵，皇馬喺A組首戰賽和國米1:1（12碼輸2:3）場波，教練安察洛堤更喺下半場換到班波面目全非，即使聽朝有上仗射入世界波嘅加里夫巴利同莫迪歷擔大旗都信唔過。

反而羅馬近況幾好，早前喺波士頓熱身賽贏利物浦1:0，跟手喺國冠盃A組首輪賽事雖然早早落後畀曼聯3粒，但最尾憑比真歷嘅世紀笠射同托迪建功，追番2:3完場，睇得出「雌狼」嘅後勁、鬥心同狀態都唔曳。加上主將好似貝拿迪亞、迪斯度甚至新兵艾殊利高爾都會悉數壓陣，人腳比皇馬齊整得多，贏面高啲喎！