比錫達斯強勢起飛

猪拉多纳

丹巴巴亞來投如虎添翼

今晚續有多場歐聯外圍賽第3圈首回合上演，阿King睇中荷甲傳統勁旅飛燕諾主場對土超球隊比錫達斯。飛燕諾今夏猶如超級市場，慘遭列強瘋狂「掃貨」，元氣大傷，相反比錫達斯獲得車路士射手丹巴巴亞加盟，此消彼長之下，飛燕諾邊有本錢讓波呀？一於力撐比錫達斯讓球客勝。

（周四凌晨2時開賽）

近年荷甲水準每況愈下，被其他歐洲列強愈拉愈遠，好似傳統勁旅飛燕諾，喺聯賽總算重返前列，但一出去踢歐洲賽即見晒底，上季更喺歐霸附加賽兩回合均不敵俄超嘅古賓。今季飛燕諾情況更曳，啱啱世盃大放異彩嘅荷蘭年輕國腳真馬特、馬田斯恩迪已經改投紐卡素同波圖，迪維積與拉素亦達成轉會協議，「挪威恩尼斯達」星治重返家鄉，主帥朗奴高文遠赴英超修咸頓執教之餘，仲帶走埋上季荷甲銀靴嘅意大利中鋒加斯安奴柏利，成隊骨幹被拆散晒，令新帥魯頓巧婦難為無米之炊。

與荷甲相比，土超水平不斷冒升，上季聯賽季軍比錫達斯亦屬歐洲賽常客，佢哋今夏以600萬歐元簽入丹巴巴亞，呢位塞內加爾前鋒上屆為車路士屢建奇功，包括歐聯8強次回合絕殺巴黎聖日耳門，只因車仔買入迪亞高哥斯達等球星令佢冇碇企，嚟到比錫達斯實在超晒班，仲有葡萄牙箭頭曉高艾美達拍住上，實搞到欠缺經驗嘅飛燕諾生牯仔暈陀陀，作客贏埋唔奇，仲有得受讓咁筍，梗係捧讓球客勝。
薩爾斯堡炒起卡拉巴克

另一場歐聯外圍賽，阿塞拜疆球隊卡拉巴克主場迎戰奧地利班霸薩爾斯堡，後者綽號「小拜仁」，斯洛文尼亞中場甘比爾、西班牙前鋒蘇里安奴等弗到冇朋友，挾住開咧頭兩場全勝怒轟11球嘅氣勢，要贏卡拉巴克兩粒唔難。最後係聽朝嘅南美自由盃4強次回合，阿根廷勁旅聖羅倫素帶住五球領先優勢，作客玻利維亞球隊玻利瓦爾相信會以守勢為主，唔會再羞辱對手，玻利瓦爾主場有一定惡氣，就算未能收復失地，都應該可以贏番場挽回面子，主勝好路。