曼聯乘勇追斬紅軍

猪拉多纳

破美國足球入座紀錄 3:1勝皇馬

曼聯在尹戈爾帶領下續向復辟王朝之路挺進！紅魔鬼昨晨於美國安阿伯密西根球場舉行嘅國際冠軍盃A組最後一輪分組賽，憑艾舒利楊格梅開二度和後備上陣嘅查維亞靴南迪斯建功，以3比1擊敗皇家馬德里殺入決賽，將與英超宿敵利物浦於周二早上爭冠軍。曼、皇戰一共吸引109,318名球迷入場睇波，創下美國史上英式足球比賽最高入場人數紀錄，能夠喺接近11萬名觀眾面前痛宰應屆歐聯冠軍，尹主帥及一眾紅魔現時信心爆棚，面對有主力缺陣嘅紅軍未驚過。

（有線61及201台周二早上8時直播）

在此之前美國最高入場人數嘅足球比賽係84年法國擊敗巴西嘅奧運男子足球賽，如果單計球會級賽事，最高紀錄係巴塞隆拿於09年對洛杉磯銀河，入場人數為93,137人，曼、皇戰今次一口氣打破兩項紀錄，足證兩軍於當地嘅受歡迎程度。尹戈爾賽後承認球場氣氛冇得頂：「在美國已經有30萬球迷現場睇過我哋比賽，我哋已打入決賽，數字肯定突破30萬，全世界觀眾都透過電視直播睇到艾舒利楊格第一個入球，我認為單憑呢球，已經值得球迷入場睇我哋。」
A楊省兩粒 小豆香川交到貨

「A楊」艾舒利楊格原被視為尹戈爾上任後被踢走嘅熱門球員之一，今仗立下奇功，相信幫佢攞番唔少分數，而且佢為曼聯先開紀錄嘅一球，全隊傳球20次，由費查開始策動，經朗尼、韋碧克到最後建功嘅「A楊」，過程充滿「Tiki-Taka」味道，絕不拖泥帶水，下半場後備入替嘅香川真司完場前10分鐘交出靚助攻予「小豌豆」查維亞靴南迪斯頂入，無論正選、後備都交足功課，就算尹戈爾證實愛將尹佩斯因為狀態不足，肯定唔會喺未來熱身賽及英超首輪對史雲斯上陣，紅魔火力依然有保證。

利物浦兩蛋贈AC闖決賽

尹戈爾亦認為今場贏波有正面影響：「皇馬尾段換入C朗係希望贏波，我哋下半場換咗唔少人，但最終亦取得入波，證明球隊正朝着正確方向。」

另一邊廂利物浦於B組尾輪賽事2比0擊敗AC米蘭，昂然進身周二早上舉行嘅決賽，不過前鋒史杜列治因傷關係，已跟拉爾拉拿和法拿根提早返回英國唔會上陣，前鋒列基林拔喺對AC嘅上半場射失12碼，未知會否對其信心有影響，正所謂寧捧當頭起，今場雙紅會一於捧曼聯客W。另外值得一提，意甲沒落豪門AC米蘭不敵利物浦後，三戰全敗排包尾之餘，仲狂失十球認真羞家，名宿兼新帥恩沙基明顯執唔掂班波，隨時捱唔到今季開鑼就執包袱。