草蜢教頭黑腳 里爾「讓主」易啅

猪拉多纳

歐聯第3圈外圍賽次回合今晚又上演，法甲球隊里爾（左）喺主場迎戰嚟自瑞士嘅草蜢，不如博多鋪2.05倍「讓主」。雖然里爾首回合領先2:0，形勢上大半隻腳踩入附加賽，返主場未必會踩行油，不過草蜢教練史基比愈撈愈霉，睇怕都好難救得番隊波，再輸多鑊唔出奇喎！

（開賽時間：周三凌晨2:30）
新兵未落場都夠砌

里爾喺熱身賽表現唔多掂，但去到歐聯外圍賽打真軍就唔同講法，全隊當堂醒番，佢哋喺前鋒迪美路轉投伊維恩後，借入利物浦前鋒奥利吉同曼城中場馬高斯盧比斯，又簽入索察後衞哥捷亞，雖然首回合奥利吉同馬高斯盧比斯懷疑因為狀態同默契問題冇落場，但里爾已經靠哥捷亞有份入波贏波，證明實力冇特別下降。

另一方面，草蜢首席射手加舒已經轉會巴素利，梗係出事啦，即使次席射手卡奧繼續留隊，又有借用嘅禾夫斯堡前鋒賓卡利法同烏甸尼斯中場梅基爾加盟，始終撻唔着，事關草蜢教頭史基比愈撈愈霉，佢做過多蒙特教頭同德國助教，近年唯一代表作係曾經帶番起哈化柏林，可惜隊波好快又打回原形，睇落佢似乎教乜死乜，咁邪避開好啲。

歐聯賽制：採主客兩回合制，今輪為第3圈外圍賽次回合，出局球隊將轉戰歐霸盃。兩回合計打和，計算作客入球優惠，未分勝負將於次回合法定時間後加時30分鐘，加時階段仍計作客入球優惠，再和即互射12碼決勝。
歐聯外首回合：里客勝2:0