飛燕諾防線被「肢解」「錫」唔落

猪拉多纳

修咸頓上季英超踢咗季好波後，陣中主將即被挖角，睇見都陰功。不過講慘點止佢哋，飛燕諾條荷蘭國腳級防線今夏亦慘被「肢解」，家陣剩低班老弱殘兵，今晚歐聯第三圈外圍賽次回合作客土耳其比錫達斯，難逃再輸厄運，捧1.9倍主勝。（開賽時間：周四凌晨1:30）
教頭朗奴高文帶埋首席射手走人

講真飛燕諾可以話慘到痹，荷蘭右閘真馬特、中堅迪維積同馬田斯恩迪，喺世盃踢得出色，即時吸引唔少球會搶購，最終先後被撬走，剩低高峰期已過嘅馬菲臣，同埋未成氣候嘅干高路同史雲雲碧克，睇吓佢哋首回合被比錫達斯兩射兩中，就知影響幾咁大。

飛燕諾後防唔掂，前線問題都唔細，教頭朗奴高文轉教修咸頓後，仲撬埋首席射手加斯安奴柏利過檔，搞到飛燕諾死晒火，即使首回合補時最後一刻射入12碼僅輸1:2，睇落出線仲有價講，可惜新帥魯頓都未執掂班波，今場焗攻盞衰多兩錢重，梗係撐有丹巴巴亞數胡嘅比錫達斯啦！
歐聯賽制

採主客兩回合制，今輪為第3圈外圍賽次回合，出局球隊將轉戰歐霸盃。兩回合計打和，計算作客入球優惠，未分勝負將於次回合法定時間後加時30分鐘，加時階段仍計作客入球優惠，再和即互射12碼決勝。