「瘋子」首騷馬賽搶韁

猪拉多纳

「瘋子」返嚟喇！法甲褪色豪門馬賽近年衰衰哋都博到張歐聯入場券，但上季一敗塗地，今季銳意變革邀請咗「瘋子教頭」比爾沙接掌兵符，今晚喺法甲首輪作客巴斯蒂亞，馬賽小讓平半捧上盤。

(TVB 302及now 714周日凌晨3時直播)

貴為前阿根廷國家隊主帥，馬賽新帥比爾沙係一名理想主義者，唔單止重視青訓，對進攻踢法亦非常執着，放走咗「矮腳虎」華布拿佢驚都未驚過，因為早早簽入阿歷辛迪尼，而且喺佢字典裏面冇人係不可取代，因為只要整體揮出其制訂嘅逼搶戰術，個人質素平平亦冇所謂，之前執教人腳麻麻嘅畢爾包，都能殺入歐霸及西盃決賽，前巴塞教頭馬天奴及智利國家隊領隊森柏奧利都係佢徒弟，絕對係一代宗師。
巴斯蒂亞將帥新埋班

巴斯蒂亞上季升班後成功站穩陣腳，不過今夏難逃大出血命運，包括卡斯里及拉斯賓天奴等主力先後離隊，元氣大傷，只係從聖伊天簽咗過晒氣嘅前馬賽箭頭白蘭達奧。最奇怪係佢哋搵咗前法國國腳馬基列尼執教，呢位鐵血防中之前只係聖日耳門教練團成員之一，經驗有限，今仗難免要向「瘋子教頭」放低3分交學費，馬賽值得捧場。