英超 開咧新生紅魔捉天鵝

猪拉多纳

嘩嘩嘩！英超打到嚟喇！今季已經係小妹第4季喺度寫足球專欄，感謝《太陽波經》畀機會小妹之餘，亦希望大家繼續支持我啦！平時入場睇本地波就睇得多，外國波就真係未試過，所以喺8月頭，小妹隻身飛咗嚟英國，準備今日去奧脫福睇英超揭幕戰，曼聯對史雲斯！「紅魔」換咗尹戈爾執教後回復勁旅本色，第1擊又點可以失威先？我捧1.9倍「讓球主勝」！

（now621台周六晚7:45直播）

上季莫耶斯帶到曼聯死氣沉沉，最後只係以第7名衝線，連歐霸都踢唔到！不過過咗去嘅嘢就唔好提嘞，「魔躉」應該向前望嘅！今季由荷蘭新帥尹戈爾帶領下，曼聯喺季前賽已經脫胎換骨，早排喺美國行更勇挫皇馬捧走國冠盃添！梗係啦，尹戈爾喎，佢帶領荷蘭喺世盃大炒西班牙、最終攞埋季軍，呢位「新魔王」堅係「戰術大師」！況且尹戈爾出名勁惡，「VANCHESTER」王朝第1擊，尹帥點都想打響頭炮嘅，一眾「紅魔」為爭位，亦肯定會趁季初搏命爭取表現，鬥心唔使懷疑。
上季開鑼戰曼聯贏4:1

出名有鬥心嘅朗尼，開季前就係憑不死鬥志、場場搏盡，終於鍊贏尹佩斯，成為新任曼聯「大佬」，尤其係佢上場友賽對住華倫西亞射失12碼，今晚回歸英超戰場，呢位新隊長肯定想做番齣好戲啦！睇番往績，上季曼聯第1場聯賽又係對史雲斯，結果作客以4:1大炒對手，食住季前勇勢，睇怕「紅魔」大炒「天鵝」嘅劇情又會重演喇。
史雲斯米捷離隊

冇錯，曼聯有勞基梳爾倦勤，但史雲斯都有靈魂人物米捷離隊，新嚟嘅巴菲迪比高美斯，建立默契都要時間啦，邊有咁快撻着呀？計番實力、往績，都係「紅魔」佔優，今晚曼聯要大炒史雲斯，冇難度啦！
Data King：曼聯主場開鑼戰不敗

‧曼聯喺奧脫福踢英超開鑼戰未輸過，11戰取得8勝3和佳績。

‧曼聯與史雲斯上季同樣喺首輪英超交鋒，「紅魔鬼」作客以4:1贏波。

‧史雲斯近3季英超首戰合共炮製14個入球。