漢堡斷窮根大炒格

猪拉多纳

科特布斯降班成隊散晒

今晚4場德國盃都有盤開，當中兩場有免費直播，黑柴焦點係頭場，愛隊漢堡上季大難不死後從頭做起，經過大事擴軍後人腳脫胎換骨，作客面對啱啱降落德丙、成隊主力走晒嘅科特布斯，有力大勝一仗，重心推介2.7倍讓球客勝。

（無綫翡翠台周二凌晨零時30分直播）

今戰雙方上季同樣令人失望，不過經過一個暑假情況各走極端，科特布斯上季喺德乙包尾降班，30名球員走咗25人，包括陣中所有主力，成隊波等同解散，只留下5個老弱殘兵，留低嘅原本只係後備，當中18歲後衞羅拔貝加上季成季只踢咗20分鐘，但今季去到德丙，除咗35歲老門將雲尼受傷外，其餘4個立即變咗重心球員，連羅拔貝加都場場正選，雖然佢哋都引入咗21名球員補充，但只有前鋒普斯比治一個花咗15萬歐元，其餘都係人哋棄將，整體實力嚴重削弱，目前喺德丙4戰僅1勝，近兩場更入唔到波，成隊人面全非相信仲有排執。

漢堡情況啱啱相反，上季僥倖保留德甲席位後痛定思痛，既換主席又覓得新贊助，斬斷窮根後大事擴軍，新兵比哈美、尼古拉梅拿、奧斯特蘇歷同史泰比既當打又有級數，球隊實力大幅提升，季前提早開操準備時間比科特布斯更充足，熱身賽演出一仗比一仗好，今晚今季首次正式賽事亮相遇殘兵，有力大勝響頭炮。
特雷斯登史浩克大交易

至於尾場直播亦係德丙對德甲，特雷斯登主場對史浩克04，上季德甲季軍史浩克人腳當然遠勝主隊，不過呢班波原本已經攻優於守，今季竟然借埋中堅柏柏杜普路斯畀利華古遜，新加盟球員都集中喺中前場，畀人感覺更加頭重腳輕，今晚面對喺德丙場場入得失得，踢咗4場全開大盤嘅特雷斯登，開出大盤機會甚高。

（無綫翡翠台周二凌晨2時30分直播）