阿仙奴客窒比錫達斯

猪拉多纳

A山大勇 德兵回歸

阿仙奴上周六英超開鑼戰只能夠險勝水晶宮，不過新兵阿歷斯山齊士表現相當對辦，兵工廠今晚喺歐聯附加賽首回合作客比錫達斯，食粥食飯都係睇佢。領隊雲格仲話會將3名德國世盃兵列作後備。「教授」計掂數，就算比軍有狀態大勇嘅丹巴巴亞都未驚過，一於捧兵工廠上盤！

（有線61及201周三凌晨2:45直播）

兵工廠開鑼戰靠「死神」艾朗藍斯喺下半場補時入波，以2:1反勝水晶宮。阿仙奴係就係贏得辛苦，但由巴塞隆拿加盟嘅A山就踢得唔錯，兩個入波都係由佢發動，相信「教授」會繼續用佢嘅速度撕破比錫達斯嘅防線。前面表現都叫對辦，不過後防傷兵問題就搞到雲格相當頭痛。左閘基蘭基比斯大腿受傷，今場極可能缺陣，雲格話仍然休息緊嘅3名德國兵梅迪薩卡、奧斯爾同普多斯基，將會喺球隊有需要嘅時候復出。依家呢個形勢，睇嚟梅迪薩卡有機會臨危受命，至於上仗客串中堅嘅哥林張伯斯，就可能打返閘位。
梅迪薩卡有機正選

對手比錫達斯今夏最大收購係丹巴巴亞，喺歐聯外圍賽對飛燕諾嘅次回合首次以正選上陣就大演「帽子戲法」，狀態Fit到漏油。不過，阿仙奴有梅迪薩卡回歸，呢位塞內加爾「長人」都幾難攞到啲咩甜頭，以現時兵工廠嘅火力，比錫達斯想力保不失都幾難，所以呢個「上盤」確係玩得過！