車路士超班「-2」照撐

猪拉多纳

車路士上場作客般尼輕鬆反勝，新球季就有個好開始，一班新兵表現亦十分對辦。呢支英超冠軍大熱今晚返到主場史丹福橋出戰，對住升班球隊李斯特城，仲唔食住個勢再贏一場？實力超班嘅車仔今場讓2球都嫌少，梗係捧2.38倍嘅「讓主」啦！

（now621台周六晚10:00直播）
哥斯達 法比仔對辦

「藍戰士」首戰以3:1反勝般尼，新箭頭迪亞高哥斯達喺英超首戰就成功開齋，一洗世界盃代表西班牙完全冇料到嘅頹勢。至於另一「狂牛兵」法比加斯亦踢得唔錯，反超前一球就係由佢交個靚助攻畀舒賀爾尼射入。呢兩名新兵轉會日子雖短，但同一班新隊友已經夾得唔錯，首戰已經踢得咁流暢，成功打出領隊莫連奴心目中嘅「車仔流」足球，睇怕遲啲夾慣威力仲勁。

今輪對手李斯特城，首仗主場逼和愛華頓其實靠運，攻勢唔夠銳利之餘，防線亦唔夠嚴密。以佢哋嘅實力，作客越級挑戰車仔，隨時吞3、4隻蛋都唔奇。今戰車仔「讓主」有2.38倍，真係好筍！