「老闆雙箭頭」孭飛恒大玩殘流浪者

猪拉多纳

出動到兩個大老闆督師打氣，廣州恒大淘寶（足智彩譯FC廣州）今晚喺亞冠盃8強次回合，應該可以上演絕地反擊，主場打爆西悉尼流浪者晉級，「讓球主勝」1.97倍抵捧。

（now670台周三晚8:00直播）
上仗被球證玩今晚報仇

恒大上星期作客澳洲輸咗0:1，主帥納比、前鋒郜林同後衞張琳芃3個仲畀球證趕埋出場，真係畀人玩到盡。咁輸法，恒大班人谷埋一肚火，賽前咬牙切齒誓要贏波，老闆許家印仲親自出馬，邀請早排入股嘅阿里巴巴集團董事局主席馬雲入場觀戰，實行打「老闆雙箭頭」催谷士氣，西悉尼今勻作客肯定有排捱喇。

雖然恒大加埋金英權，今日有3個主將坐波監，納比又唔可以現場指揮，但係你做得初一我做得十五，西悉尼今晚除咗要面對恒大強勁嘅鋒力，仲隨時畀球證跣番一鑊，為上場波嘅得益還債，呢場波點都係撐恒大贏波入4強。