馬體會諸事不順捧對家

猪拉多纳

衞冕之路一向都非常難行，上季西甲冠軍馬德里體育會今季諸事不順，除咗畀人拆骨，迪亞高哥斯達、泰拔高圖爾斯、菲臘路爾斯、韋拿等主力悉數離隊他投之外，買嚟頂替鋒霸「迪哥」嘅文迪蘇傑早前又被撞爆鼻，今場好大機會缺陣，結果馬體會喺西甲踢咗4場波，已經有兩場失分而回，包括上場主場都贏唔到切爾達，歐聯分組賽首戰更輸畀奧林比亞高斯，佢哋今場作客狀態不俗艾美利亞都係難言穩勝，捧受讓嘅主隊﹗

（now 632周四凌晨2時直播）
艾美利亞主場受讓筍

艾美利亞無疑係西甲弱旅，上季排第17，掹車邊唔使降班，不過呢支廢隊正正就喺上季於主場爆冷擊敗剛剛升上榜首冇耐嘅馬體會，搞到馬體會由第1跌返落第3，好彩馬體會最尾都贏得西甲冠軍。今季開季艾美利亞踢落一啲都唔似廢隊，4場西甲只係輸咗1場，上場更喺10人應戰下作客擊敗皇家蘇斯達，認真估佢唔到，要知道「銀河艦隊」皇家馬德里都喺皇蘇主場反輸2比4，艾美利亞竟然贏到佢哋，真係唔可以睇小，冇咗文迪蘇傑、基斯甸洛迪古斯等主將嘅馬體會作客讓唔起艾美利亞，讓球主勝值得一博﹗