PSG搶分心切大鬧卡昂

猪拉多纳

今個周中好多聯賽都開快車，熱鬧到暈，阿King嘅過關重心落喺法甲卡昂主場迎戰巴黎聖日耳門（PSG），後者貴為近兩季霸主，近期於聯賽頻頻失分，班球員畀教頭白蘭斯省到立立令實搏甩髀，對手卡昂火力全開亦唔係人咁品，呢場寧願捧入球大。

（now 714周四凌晨3時直播）

連續兩季喺法甲封王嘅聖日耳門，今季明顯劍指歐聯，因此難免喺國內賽事瞌眼瞓，近四場聯賽和咗三仗，包括伊維恩、雷恩等弱旅，主帥白蘭斯嬲到噴火，鬧爆班守將非常唔集中，搞到失波兼失分，「爆炸頭」大衞雷斯領導嘅防線責無旁貸，就算王牌伊巴謙莫域及卡雲尼入埋都唔夠後面輸。適逢卡昂前線大有改善，尤其係拉斯賓天奴、蘭傑斯兩大前鋒重拾射門鞋，而PSG搶分心切，亦唔理得咁多照攻可也，雙方隨時合演入球騷，轉玩大盤好過。
荷盃飛燕諾勝算「高」

至於荷盃第二圈方面，伊高斯主場出戰飛燕諾，前者有前鋒阿歷士舒賀克、中場里斯利迪沙因傷缺陣，實力大削。飛燕諾只得守將盧比斯卡比爾受傷唔出得，相信可輕取伊高斯。最後南球盃第二圈次回合，哥倫比亞球隊卡利主場硬撼烏拉圭勁旅彭拿路，雙方首回合打和2比2，卡利有前鋒波里、中場雲迪利亞及莫積卡仍然因傷缺陣，失咗兩個作客入球嘅彭拿路不能坐以待斃，必定盡力爭勝，今仗靠晒前祖雲達斯射手薩拉耶達爭士哥，有得受讓不妨捧讓球客勝。