PSG士氣盛主場屠摩

猪拉多纳

今晚法甲尾場有場褪色大戰，巴黎聖日耳門（ＰＳＧ）主場鬥摩納哥。摩納哥因為老闆縮皮已經淪為中型班，而且今季孭飛射手貝碧托夫據報有傷料缺陣，作客難敵剛贏巴塞隆拿、士氣正盛嘅ＰＳＧ，讓球主勝可作過關重心。

（TVB 302周一凌晨3時直播）

摩納哥老細魯博洛夫列夫盛傳因為離婚需要賠償巨額贍養費畀前妻，搞到冇心冇力搞波，今夏先後放走占士洛迪古斯及法卡奧，已令球隊表現大跌Watt。未計周六晚戰果，佢哋依家只排聯賽榜十二位，和上季排第二差天共地，加上佢哋板櫈深度一般，上周中歐聯遠赴俄羅斯鬥辛尼特，舟車勞頓更蝕章，最慘係今季代替法卡奧喺前線攻堅嘅貝碧托夫據報有傷，今場未必可上陣，實力進一步受損。

ＰＳＧ上周中同樣需要踢歐聯，不過佢哋連續2場主場出擊，體力上有優勢，況且佢哋上場喺缺少王牌射手伊巴謙莫域嘅情況下，依然能以3比2擊敗西甲勁旅巴塞隆拿，士氣、信心皆處頂峰。這名瑞典國腳今仗有機會復出，ＰＳＧ攻力更加有保證，捧讓球主勝啱數。
恩華尼斯打「羅」冇手軟

另外兩關賽事，蘇超恩華尼斯主場鬥羅斯郡，羅斯郡今季八場聯賽輸七場，而且場場有失波，恩華尼斯主場穩袋3分。

（亞洲國際台周日晚7時45分直播）

最後荷甲阿積士主場鬥施禾利，阿積士剛於歐聯作客塞浦路斯打和尼科西亞，施禾利於上季荷蘭盃決賽及今季荷超盃曾兩勝阿積士，作客未驚過，捧讓球客勝。

（now 670周日晚10時45分直播）