強陣出擊！法國實食冇黐「牙」

猪拉多纳

除咗歐國盃外圍賽之外，查實今晚仲有場好嘢，就係由法國硬撼葡萄牙嘅重量級熱身賽。呢場「06年世盃4強翻版戰」星光熠熠，C朗喺皇馬就威晒嘞，但亨格比利相信團結就是力量，睇好有賓施馬、保羅普巴同基沙文助陣嘅法國可以砌低葡萄牙，呢鋪一於撐1.62倍法國主勝！

（有線64及203周日凌晨2:45直播）
金靴獎同哨牙蘇有份 C朗寸爆：唔同台領獎

C朗新季火速入局，開季冇耐已經省入13個聯賽「士哥」。據西班牙《體育報》爆料，上季喺西甲攻入31球嘅佢會喺11月領歐洲金靴獎，拒絕與同樣獲得呢項殊榮嘅蘇亞雷斯喺本月15日齊齊領獎，皆因唔想畀「哨牙蘇」搶晒鏡喎！C朗有料自然寸得起，可惜吖，葡萄牙唔係皇馬，平時搭開卻奧斯、加里夫巴利同莫迪歷，但喺國家隊就要靠自己，樹大招風隨時冇啖好食。今晚首度領軍嘅葡萄牙新帥費蘭度山度士，上任後竟然仲徵召36歲中堅卡維奴以及31歲翼鋒哥利斯馬，冇人用到咁，睇佢老人家就算識變魔術都未必救得到隊葡萄牙。
法國超新星弗爆

法國喺迪甘斯執教下穩打穩紮，艾拉、沙格拉等老將經驗十足，主力好似賓施馬、卡比耶同華布拿正值當打之年，加埋保羅普巴呢件上位超新星，整體戰鬥力贏葡萄牙幾條街！賽前有消息話，時隔1年獲重召嘅馬賽鋒將皮耶將會擔正，聯同華布拿、基沙文同賓施馬攻堅，淨係呢個「法蘭西鐵四角」都夠得人驚啦，葡萄牙點頂呀？