熱拿亞讓「玻」有暗湧

猪拉多纳

嚴重水災影響備戰

熱拿亞今晚喺意甲主場對安玻里，讓平半有暗潮。最近熱拿亞遇上大規模水災，連周邊地區都大受影響，佢哋嘅操練同備戰工作難免受阻。相反新升班嘅安玻里火力唔講得笑，下盤博得過。

（TVB301台、廣東體育周二凌晨2:45直播）
安玻里聯賽開齋 新星勁入波

原本熱拿亞日前同薩克達踢熱身賽，最後都踢唔成，而且水災造成一人喪生，可想而知幾大件事。呢次天災除咗搞到熱拿亞球員唔能夠正常操練，佢哋嘅作戰心情都難免受影響，就算踢過祖雲達斯嘅前鋒馬特尼開始上力，都唔值得過分睇好。

事實上，安玻里升班後表現唔算太差，6場聯賽只輸2場，國際賽期前主場仲以3:0砌低巴勒莫，打開今季聯賽勝利之門。前線除咗射手達雲奴同前鋒馬卡朗尼有豐富意甲作戰經驗，23歲中場新星佩斯亞利尼更連續3場入波，佢係安玻里青訓產品，今場隨時帶挈大家收錢。