皇馬巴塞 驚世大戰

猪拉多纳

咬人蘇刑滿復出 全球聚焦

萬眾矚目嘅西班牙國家打吡今晚爆發，「銀河艦隊」皇家馬德里喺主場火併聯賽榜「一哥」巴塞隆拿，而今仗焦點中嘅焦點梗係「咬人蘇」蘇亞雷斯刑滿復出，等咗咁耐，終於可與美斯同尼馬「三劍合璧」，組成「南美最強鋒線」撲擊同樣星光熠熠，由近況弗到冇朋友嘅C朗領軍嘅皇馬。呢位因喺世盃咬人搞到一身蟻嘅烏拉圭前鋒，餓波咁耐一「放監」誓要盡騷哥利，兩軍攻力都咁強，大盤當然係首選！

（now 632周日凌晨零時直播）
三劍合璧強戰C朗

近年國家打吡嘅主要劇目，離唔開雙方「男一」C朗與美斯永無休止嘅大鬥法，其中C朗擺脫傷患後重上高峰，喺上周皇馬作客大勝利雲特省兩粒後，開季8場聯賽上陣7次已經轟入15球，打破塵封76年嘅西甲前8輪入球紀錄，連埋周中歐聯作客利物浦又先開紀錄，呢位葡萄牙萬人迷喺近9場正式賽事入咗17粒，真係着晒火，而皇馬眾星如賓施馬、占士洛迪古斯、卻奧斯亦漸入佳境，協助皇馬連贏8場殺聲震天，主場入波完全冇難度。

雖然美斯喺今季西甲只入7粒，冇C朗咁搶鏡，但呢位巴塞王牌今季轉型成功，喺頭8輪為隊友送出7次助攻，並帶動隊友尼馬、拿傑迪錫等更加夠膽入楔埋門，使「地上最強」攻擊點分散，令對手防不勝防。不過今仗最大焦點，紿終係「蘇神」蘇亞雷斯登陸西甲後首度登場，呢位喺世盃時咬傷基亞連尼被罰停賽4個月嘅烏拉圭前鋒，以8,100萬歐元天價加盟，成為今夏轉會市場嘅標王，足足等咗4個月終可為新東家披甲，仲要咁啱撞正作客死敵皇馬，「發晒牙痕」嘅阿蘇必定施展渾身解數，用入波回報巴塞嘅信任。
作客難保清白之身

大家可能話巴塞今季8場聯賽、合共720分鐘保持不失，智利門神哥迪奧巴禾與法國守將馬菲奧來投後，令防線穩陣咗好多，但斯維覺得只因之前嘅對手如伊巴、華歷簡奴、畢爾包之流攻力太曳，實在難對巴塞後防構成威脅，今仗出戰「銀河艦隊」先至係真正考驗，相信佢哋再冇零封皇馬嘅能力。

兩條歐洲最頂級鋒線正面交鋒，勢必火花四濺，況且「三哥」皇馬現時落後榜首巴塞4分，只要贏波便可追貼「地上最強」，挾地利梗係全面搶攻，隨時合演入球騷，大盤不容錯過。
數讀國家打吡

6：C朗曾連續6場國家打吡入波，係一項紀錄

12：雙方最懸殊賽果係1943年西班牙盃皇馬大勝11比1，共出現12個入球

13：C朗於國家打吡上陣21場共轟入13球

21：美斯於國家打吡上陣27場入21球，屬歷史之冠

44：現時巴塞陣中有11人曾於國家打吡入波，合共轟入皇馬44球

228：兩隊史上正式賽事交鋒228次，皇馬獲得91勝，巴塞贏88場