車仔副選兵照o趙梳士貝利

猪拉多纳

咪睇梳士貝利係乙組仔，佢哋喺英聯盃頻頻越級挑戰成功，殺到入16強，演出確係幾抵讚。可惜吖，今輪遇着英超班霸車路士，莫講話「藍戰士」派遣舒賀爾尼、約翰米基爾等「副選」已經贏幾條街，加埋足智多謀嘅莫連奴臨場指揮，梳士貝利想再創奇迹都幾難，一於熱捧車仔1.56倍「讓客」。

（TVB301台、廣東體育周三凌晨3:45直播）
「副選」舒賀爾尼 施治 星光熠熠

英聯盃喺唔少豪門眼中屬「雞肋」，但莫連奴首度執教車路士就攞過兩次聯賽盃，唔使驚今鋪唔去。雖然車仔喺英超激戰完曼聯，今場輪換在所難免，但所謂「副選」係舒賀爾尼、穆罕默德沙拿、約翰米基爾同施治等高質球員，佢哋上圈淘汰英冠保頓，埋門次數28比3盡顯當中差距，今場鬥再低兩級嘅梳士貝利，最低限度都入兩粒啦！

雖然梳士貝利喺今屆英聯盃踢出超水準，先後淘汰英超嘅李斯特城，同英冠嘅諾域治及黑池。但今輪面對班霸車路士，佢哋都好似打定輸數咁款，箭頭丹尼爾艾卡普直言擊敗車路士只不過係夢想，踢好聯賽至夠實際。或者咁講只係想為隊友減壓，但換個角度諗，亦顯示出佢哋對砌低車路士冇咩信心，咁樣又點踢好波呢，聽做車仔炮灰。