紅牛尖角紅牛尖角

猪拉多纳

大帝復出夥拍神射手

美職季後賽聽朝輪到東岸淘汰圈賽事開打，紐約紅牛主場迎戰肯薩斯體育會，唔係咁熟紅牛嘅朋友至少都知呢隊波有位「亨利大帝」坐鎮，不過紅牛今季最紅嘅球員並唔係佢，而係巴利胡禮菲臘斯，呢位英格蘭前鋒以27個入球成為美職常規賽神射手，追平咗常規賽單季入球紀錄。今場撞正近3戰全敗嘅肯體會，入球大同主勝都值得捧場！

（周五早上8時開賽）

如果有睇開英超嘅朋友應該識胡禮菲臘斯，呢位矮仔翼鋒踢過曼城同車路士兩大球會，可惜浮浮沉沉，依家只係効力緊昆士柏流浪。佢位細佬巴利胡禮菲臘斯以往一路踢緊英格蘭低組別球會，直至上年加盟紐約紅牛，成功搵到第二春，今季更弗到冇朋友，紅牛喺常規賽一共入咗55球，即係話近半嘅入波係由巴利胡禮菲臘斯包辦。紅牛上場常規賽收咧戰咁啱又係對住肯體會，結果巴利仔一個玩殘對手，個人梅開二度幫紅牛贏波。紅牛有呢位弗爆射手，再加埋應可趕及傷愈復出嘅亨利，主場出戰有望旗開得勝。
肯體會防線殘到痹

肯體會係上季防守王，憑住超強防守贏埋美職總冠軍，可惜佢哋依家陣容不整，後衞伊基奧柏拉、彭馬布朗及邁亞斯都因傷缺陣，好有可能再次畀紅牛一對箭頭玩殘，真係捧唔落手！