FC東京擴軍 斟沙維史奈達

猪拉多纳

燒錢衝擊來季日職錦標！

2015年「沙士」襲東京？《日本Sports》大爆，FC東京打算下季大搞，計劃羅致沙維同史奈達，支援超新星武藤嘉紀爭奪日職冠軍，而且沙維曾經跟巴塞隆拿去日本踢世冠盃，對於東瀛印象唔錯，有啲興趣跳槽，有可能成為日職下一位巨星級球員。
支援超新星武藤嘉紀

隨住武藤嘉紀喺日本國家隊火速上位，成為日職新萬人迷，東京有信心下季門票同贊助收入，將會同時大增，於是不惜工本計劃撬上季日職神射手大久保嘉人，甚至想搵埋沙維或者史奈達幫手。大家咪以為東京發緊夢呀，因為沙維喺巴塞嘅位置，已經被新加盟嘅拿傑迪錫取代，佢出年1月就35歲，所以轉會絕對唔出奇。何況日本傳媒估計科蘭加盟大阪櫻花，年薪都可以達到6億日圓，沙維隨時去得到10億（約港幣683萬元），咁大筆錢佢點都會唔心郁啫。
牙擦蘇倒戈阿積士

至於巴塞今晚喺歐聯F組作客阿積士（有線63周四凌晨3:45直播），就係蘇亞雷斯加盟後，首次喺歐聯登場，加上佢要倒戈出戰自己嘅成名球會阿積士，當然受注目啦！不過蘇神賽前就寸賣走佢嘅利物浦，近年冇個進攻中場踢得好，言談間寸紅軍阻住佢發達，加上《阿斯報》踢爆美斯為咗操起狀態，兩星期前已經請咗同鄉兼阿根廷國家隊體能教練迪安祖亞去佢屋企住，又即管睇吓美斯同「哨牙蘇」今晚係咪有料到。