惡客諾士郡強襲阿克寧頓

猪拉多纳

今晚除咗國際賽之外，英格蘭足總盃亦有幾場第一圈重賽進行，其中英甲作客王諾士郡鬥低一級別嘅阿克寧頓，只要發揮今季作客嘅一貫水準，力足喺法定時間之內擊敗對手晉級，客W可作過關重心。

（周三凌晨3時45分開賽）

諾士郡現時喺英甲排名第四，8場作客未輸過更加係全英甲作客成績最好嘅球隊，最主要原因係佢哋防守穩陣，8場作客只失4球，有5場保持清白之身，曾經効力曼聯嘅門將卡路爾絕對功不可沒。呢名北愛爾蘭國腳上周六凌晨於歐國盃外圍賽出戰羅馬尼亞，然後不足48小時再趕返球會於上周六晚聯賽作客鬥高雲地利上陣，有承擔兼夠Heart，結果佢亦成功帶領諾士郡贏1比0保持聯賽作客不敗身。阿克寧頓連續兩場比賽交白卷，攻力一般，想爆冷唔容易，今場捧客W啱數。
羅奇代爾哀兵上陣獻「細」

另外兩場英足盃重賽，英甲羅奇代爾主場迎戰英乙諾咸頓，羅奇代爾上季未升上英甲前，於英乙兩次鬥諾咸頓全勝，不過佢哋上周末於聯賽0比1不敵維爾港，狀態一般，今場捧細盤。另一支英乙球隊梳士貝利於主場越級挑戰英甲華素爾，梳士貝利係英乙主場王，今季9戰取得8勝1和，攻入21球只失3球，有力擊敗作客平平嘅華素爾。