巴西「讓客」炒起奧地利

猪拉多纳

新隊長尼馬狀態弗！

重生巴西撲擊奧地利！「森巴軍團」自從由新帥鄧加執教鞭後，一洗世盃嘅頹風，至今5戰全勝入12球兼零失球，重拾勁旅本色。今晚佢哋作客同奧地利踢熱身賽，相信幾難中止自己嘅連勝紀錄，一於撐2.15倍「讓客」。

（TVB302周三凌晨2:00直播）
冇得做巴西喼頓 堤亞高施華：心碎

話巴西浴火重生真係一啲都唔誇張，佢哋喺世盃後連戰哥倫比亞、阿根廷等強隊都淨勝而回，對住次一級嘅日本同土耳其更加係大開殺戒，各派4蛋，王牌射手尼馬呢2場仲轟入6球！狀態Fit成咁，難怪鄧加上仗決定正式將隊長臂章交託畀呢位巴西人氣王，今次對住實力一般嘅奧地利隨時再擦餐勁嘅。

至於被褫奪隊長嘅堤亞高施華以「心碎」形容自己嘅心情，上仗佢連個正選位置都被祖奧米蘭達搶埋。好在呢位鐵衞經驗豐富，強調自己會以表現打動鄧加。講真施華嘅防守能力絕對係世界級，既然佢今仗咁有火，睇怕奧軍都冇啖好食。雖然巴西尋日朝早操練，尼馬同費蘭甸奴都冇出現，令人擔心佢哋係咪有傷，不過巴西足總就澄清尼馬冇事，咁大家唔使擔心啦。

奧地利雖然最近取得3連勝，不過對手只係俄羅斯、黑山、摩爾多瓦等貨色，而且全部僅以1球險勝，表現未見有太大說服力，呢啲虛火睇怕今仗係時候被巴西撲熄。