熱拿亞3大將缺陣 讓唔起巴勒莫

猪拉多纳

周二凌晨意甲熱拿亞主場迎戰巴勒莫，論近況兩軍同樣唔錯，不過熱拿亞中場樞紐史杜拿路今場停賽，表現難免受影響，相反巴勒莫箭頭保羅戴巴拿為逃過被變賣套現嘅厄運，近期愈戰愈勇頻頻建功，一於揀受讓平半嘅「傻豹」下盤。

（TVB301及廣東體育周二凌晨3:45直播）

熱拿亞近6場聯賽4勝2和，睇落戰績標青，但實情佢哋上輪作客卡利亞里，若非對手烏龍波送禮逼和1:1，不敗走勢早就斷纜。雖然僥倖唔使輸波，不過唔代表冇「後遺症」，事關中場核心史杜拿路喺嗰場波紅牌被逐，今場要坐波監，中後場主將湯馬士連干同迪美奧又要養傷，對攻守兩方面造成唔少影響。
傻豹射手 保羅戴巴拿證身價

另邊廂，巴勒莫近5場聯賽淨係作客輸畀祖雲達斯，其餘4場3勝1和，演出相當對辦。「傻豹」首席射手保羅戴巴拿近期盛傳冬季轉會窗將被球會賣走，不過呢位阿根廷箭頭話明希望繼續留效外，仲連續兩場有斬獲，實行以表現證明留隊決心。「傻豹」前鋒夠鬥心，今場又可以強陣出擊，受讓唔捧等幾時！