喜勁飛3班超級

不死鸟

賀賢馬房的「喜勁飛」（上圖），上季只出賽過兩次，6月13日首次上陣出爭田草1400米，臨場票數只得2.8倍成大熱門開跑，顯見幕後有晒信心飛搏殺，可惜事與願違，最後只跑第五。其實，睇回呢仗雖三甲不入而落敗，但馬兒表現算不差。該仗牠起步稍慢，但很快展步已跟上前列馬群，在彎位走二疊距前領馬八、九馬位，而當日Ｃ+3跑道係有利內欄跑法，而該日前三名馬匹包括「大王者」、「長勝」、「壽比南山」均走一疊轉彎，反之「喜勁飛」走外疊相對比較蝕章，但牠在直路上仍能跑出22.56末段全組馬最快時速，可見此役「喜勁飛」在初出欠經驗及狀態不足下，仍可交出如斯高水準得第五，只負頭馬二又四分三馬位，表現收貨有餘。
「喜勁飛」相隔三周於煞科戰7月1日再上陣，更增程跑1600米，第二次上陣對一匹3歲馬增程有點難度，但牠陣中表現出色卻令人驚喜，該仗牠出閘依然稍慢，跑過100米後，已見牠穩步上前有濃厚角逐興趣，入正直路後於最後300米，見到柏寶擺正呔後，稍鬆韁繩令馬兒出正左腳發力，馬兒以勁勢直奔終點，贏馬過程不費吹灰之力，3歲仔初跑1600米即贏難度甚高，顯見牠實力高強。展望呢匹質新佳駟，今季踏入4歲是其成熟期，目前評61低分在三班作戰擺明超級，睇腳法越長越好，早熟份子今季初出如爭田草1600米，屆時有作戰狀態，有力一出言勝。