勝利「阿德」鬥攻玩大佢

猪拉多纳

澳職今日有場獨腳戲，墨爾本勝利會喺主場迎戰阿德萊德聯，梗係玩入球大着數，事關勝利教練梅斯卡特爆響口，唔相信對手今仗會玩死守，加上大家熟悉嘅阿德萊德聯教練甘巴爾，一向作風係大踢西班牙式進攻足球，今場玩大佢冇衰！

（有線64及203周五下午4:40直播）
勝利教頭叫咪死守

現時落後次席「阿德」2分排第3嘅勝利，連盃賽近10戰6勝4和保持不敗，不過上星期佢哋喺主場僅以1:0砌低布里斯班獅吼，教練梅斯卡特就好唔滿意，話對手擺大巴陣搞到場波冇晒睇頭，今戰賽前佢出口術叫「阿德」唔好玩死守，以免悶親佢哋啲球迷喎！

事實上勝利係目前澳職入波最多嘅一隊，今季7場聯賽勁入15球，當中射手貝利沙就有5球進帳。對手「阿德」連盃賽近6場亦有5勝1和，期間有5場至少攻入2球，而且教練甘巴爾崇尚進攻足球，以前執教傑志都有「港版巴塞」美譽，照計會實牙實齒同勝利鍊過。