蝙蝠兵當黑 簡唔落手

猪拉多纳

改會徽惹官非 連續3場不勝

「蝙蝠兵團」黑氣纏身！華倫西亞季初係威係勢，最近唔單止回落3戰不勝，就連佢哋想改自己個蝙蝠Logo都搞到一鑊泡。黑成咁，今晚喺西班牙盃第4圈首回合作客華歷簡奴仲要讓平半，識揀梗係追對家，1.84倍下盤咪錯過。

（開賽時間：周五清晨5:00）

華倫季初一度強勢取得5勝2和，不過呢班波近排開始運滯。早前佢哋想將個蝙蝠Logo對翼由向下改成向上，不過被美國嘅DC漫畫公司告佢涉嫌抄襲《蝙蝠俠》。

事實上華倫個蝙蝠Logo比「蝙蝠俠」更早面世，唔少球迷都撐佢哋據理力爭，點知華倫會方最終縮沙認輸放棄新會徽，仲要死撐自己唔係驚，只係避免捲入場外糾紛。睇見「蝙蝠兵團」失去振翅高飛嘅機會，球迷定球員都肯定會覺得冇癮啦！
華歷簡奴回勇連捷 貝爾奴近況Fit到漏

場外舉白旗息事寧人，場內仲失去幸運女神眷顧。華倫早前連鬥畢爾包同利雲特，雖然攻門多對方成倍，偏偏攞唔足3分，上場仲霉到畀出名入波少嘅巴塞中場布斯基斯絕殺全失3分。家陣佢哋除咗中場柏利祖識入波外，其餘戰友全部失晒暈，仲點揀得落手吖！

相反對手華歷簡奴近況回勇，連贏兩場兼未失1球，頻頻攞分升上積分榜中游位置，可以分心爭盃仔。加上前鋒貝爾奴最近Fit到漏，連續3場唔係入波就係交出助攻，話唔定今晚由佢出手收服呢隻「黑蝙蝠」添呀！