禾夫斯堡作客拆蜂巢

猪拉多纳

多蒙特今季喺聯賽表現唔及喺歐聯戰線咁好，依家仲喺聯賽榜下游掙扎緊，今晚主場迎戰前列分子禾夫斯堡，又有進攻兩大核心馬高列奧斯同米希達利恩因傷長抖，殘陣出擊邊讓得起禾夫斯堡1球？「狼堡」受讓咁筍，梗係要捧2倍嘅「讓客」啦！

（有線61及201周四凌晨3:00直播）
多蒙特主將輪住傷

「蜜蜂軍團」今季喺歐聯踢到好似識飛咁，於D組以首名出線，但係一返到德甲就即時走樣，搞到依家仲喺榜下游徘徊緊。搞成咁最主要都係因為一班主力受傷問題嚴重，好少能夠以最佳陣容出擊。多蒙特今戰有進攻核心馬高列奧斯養傷，又有另一大將米希達利恩大腿受傷抖6周，起碼歇冬之後先復出，以呢個殘陣應戰，教練高普就算扭盡六壬都未必可以扭轉乾坤。

另邊廂嘅禾夫斯堡今季表現令人眼前一亮，近4場連同歐霸3勝1和，走勢相當凌厲。「狼堡」現時有幾件傷兵，不過都係後備球員，一眾主力都可以上陣搏殺，試問多蒙特點頂得住空群而出嘅「狼堡」？