東南錦決戰首回合 泰國象踩扁馬來虎

猪拉多纳

東南亞錦標賽終極決戰首回合，今晚喺曼谷爆發！「戰象」泰國主場迎戰「馬來虎」馬來西亞，為咗2,000萬泰銖（約港幣470萬）奪冠獎金，決心先下一城，2倍「讓球主勝」值得一博。

（now670周三晚8:00直播）
泰國懸賞 470萬爭標

呢場「象虎大戰」响曼谷掀起撲飛潮，上星期五開始公售，42,000張門票幾粒鐘內賣清光，仲搞到網上售票系統都冧埋，認真誇張，可以預見今場波，班東道主球迷，會對馬來西亞形成好大心理壓力。

由往績去睇，泰國呢14年嚟主場都食住馬來西亞，係得04年場友賽輸1:2，其餘5戰全部贏晒，仲鋪鋪都派蛋，3個禮拜前兩隊响新加坡交手，泰國一樣贏3:2，「馬來虎」真係遇「戰象」必死。雖然泰國件前鋒老將基奧桑拔養傷，但係佢哋個足總懸賞咗接近500萬港紙冠軍獎金，只要首回合炒到馬來西亞，筆巨獎就差唔多落得袋，今晚點會唔搏殺吖。

咁馬來西亞完全冇機會偷雞咩？睇落就好難咯，因為除咗往績蝕晒章，至攞命係主帥沙禮有鋪變陣癮，打5場波總共用過20個球員，幾乎場場都執過位，今場賽前佢又話要諗龍門用邊個喎，前鋒線係用傷愈嘅沙菲依，定係老將蘇古阿丹塔英德拉，都令佢十五十六，一隊波個陣容咁唔穩定，又點培養到默契呀？作客聽吞蛋啦。