帕爾馬水喉射住有揸拿

猪拉多纳

由於下周一進行意超盃，有兩場意甲提前開波，今晚拿玻里主場對帕爾馬，有人歡喜有人愁！拿玻里今季成績未如理想，教練賓尼迪斯已聞到魷魚香，軍心進一步受打擊。帕爾馬成功引入俄羅斯財團解決財困問題，可專心護級。帕爾馬受讓抵玩，一於博3.4倍讓球客勝。

（TVB 301周五凌晨4時直播）

拿玻里連續4場聯賽失分，跌至第7位，球隊上仗吞AC米蘭兩蛋後，意國傳媒爆料，指會方同賓尼迪斯關係瀕臨破裂，執包袱只係時間問題。賓帥接掌拿玻里後，引入希古恩、荷西卡利祖、艾比奧爾等「親兵」，如果佢離任拿玻里地震都似。球隊現時士氣處於低谷，主帥前途未明朗化之前，恐怕難有起色。

帕爾馬早前因財政問題被扣1分，好在球會終於搵到買家，尋日成功完成交易，總算穩定落嚟，依家首要目標係搶分護級。其實佢哋人腳唔錯，鋒線上卡斯辛奴仍然勇猛，柏拿甸奴亦翻生，近3仗入兩球，有力同拿玻里周旋到底。
祖記被追貼要發力

另一場祖雲達斯作客卡利亞里，祖記連和兩場聯賽後，依家只係領先次席羅馬1分，不容再失，遇上弱隊卡利亞里正係重敲勝鼓良機，贏兩粒唔成問題，直取讓球客勝。

（TVB 301周五凌晨2時直播）