皇馬撼AC 入球騷冧粉絲

猪拉多纳

袋3,800萬出場費 點敢揸流攤

杜拜挑戰盃4萬張波飛上個月已經賣清，皇家馬德里今晚對AC米蘭，場面肯定墟冚，而且皇馬踢呢場表演賽，出場費達到400萬歐元（約3,784萬港元），收咁多錢又點可以揸流攤呀？況且安察洛堤遇上恩沙基師傅遇徒弟，梗係唔可以失威，玩1.4倍入球大啦！

（有線61、201周三凌晨0:00直播）

皇家馬德里首次參加杜拜挑戰盃，但佢哋喺2014年旺到難以置信，陣中嘅「同花順」又夠晒星味，所以消息話皇馬今次踢呢場波，就袋成400萬歐元戲金。何況皇馬勁重視中東市場，佢哋喺世冠盃決賽打沉聖羅倫素達成22連勝後，唔似會突然撻唔着，教練安察洛堤領軍倒戈更加唔衰得。
馬些路 拉莫斯受傷冇隨隊

雖然中場莫迪歷未好番，左閘馬些路同中堅沙治奧拉莫斯都有傷冇隨隊，不過C朗近日再獲得2014年環球足球大獎，個人近4年3次得到呢項殊榮，相信佢同女友伊蓮娜甜蜜過聖誕會更加開心。依照C朗要威到盡嘅個性，2014年最後一場比賽梗係要入波，整番個完美收爐迎接2015年啦！
AC本田圭佑 返日備戰亞洲盃

另一方面，杜拜挑戰盃3屆冠軍AC米蘭有好多傷兵，況且今季勁搶鏡嘅前鋒本田圭佑已經被日本國家隊徵召備戰亞洲盃，射手費蘭度托利斯尋日亦落實外借到馬德里體育會，而由「床單兵團」來投嘅翼鋒阿利斯奧施斯，尋晚雖然去到米蘭進行體測，但今次杜拜之行係冇佢份。只不過咁，紅黑兵團教練恩沙基向來大無畏，對住佢師傅安察洛堤唔似會玩龜縮，入球大抵玩！